असफल यात्री

सगरमाथा चढ्ने ईरादा, तर सपना विफल भयो ।
भकुण्डो सरि जिन्दगी ठक्कर-चक्कर पायो ।।


हिड्दा हिड्दै कर्मले, यात्रामा कता डोर्‍यायो ?
घाम-पानी र झरी-बादल हँसायो-रूवायो ।।


थाहै नपाइ आज रेगिस्तानको गास र वास गरायो ।
मनको लड्डु घिऊ सङ्ग खानु पर्ने बाध्य बनायो ।।


के-के भयो-भयो, जीवनको गतिशील पाइलामा ।
अधुरै रहे सपनाहरु, लेखेछ के छैठौ दिनमा ।।


गुलाब पनि बिझाउने भयो नयनहरुमा सजाउदा ।
हाँसो पनि फिका लाग्यो मन्द मुस्कान फिजाउदा ।।


हावा-हुरी धेरै चले, बाढी-पहिरो असिना ।
आघात पर्ला फेरि कतै, घाऊहरु बल्झिदा ।।


नसम्झनु बेहत्तर राम्रै ठान्नु वर्तमानलाई ।
ललाटको खेल यस्तै दोष नदिउं कसैलाई ।।

रुपलाल बिस्वकर्मा
दमौली, तनहुँ
हाल: दुबई